KAMPUNG Palui tapilih nang paling bahasil malaksanakan KB. Angka kelahiran halus banar bahkan menurut BKKBN tarmasuk pertumbuhan nol, karna kabarhasilan maka pambakal maadakan syukuran, macam-macam acranya tamasuk hiburan.
\"Karna KB bahasil maka bubuhan ikam Lui ai bulih haja bararamian, bamumusikan, banyanyian atawa dangdut\" ujar pambakal
\"Akur banar pambakal ai, karna wayah ini musimnya. Dangdut wan banyanyian itu tamasuk kabudayaan kita\" ujar Palui.
\"Aku katuju banar Lui ai pandapat ikam itu karna jangan sampai umpatan badansa, atawa bararamian nang bisa marusak moral apalagi taumpat banginginuman ubat nang haram itu\" ujar pambakal.
\"Kami siap pambakal ai, acaranya malam ahad kaina\" ujar palui lawan kakawalannya sambil manyiapakan panggung wan hiasannya. Imbah tuntung acra sambutan sambutan maka wayah acara hiburan, pambakal mangiau Palui supaya inya mamulai banyanyi.
\"Lui ikam baduitlh?\"ujar pambakal idum.
\"Gasan napa baduit banyanyi pambakal, apakah gasan dilelang suara hanyar duitnya gasan pambangunan titian\" ujar Palui.
\"Ini kadada urusan bajual suara lui ai, tapi ikam baduit lawan kakawanan ikam jua Garbus atawa Tulamak\" ujar pambakal.
\"Bubuhannya itu kada panduitan pambakal ai, jangan saribu atawa dua ribu, ruku haja maminta wan ulun\" Ujar Palui.
\"Pokoknya ikam banyanyi baduit\" ujar pambakal mangarasi. \"Kalau manyanyi baduit, biar kada jadi ulun hakun haja\" ujar Palui umpat mangarasi.
\"Napa nang dihualakan pina bakakarasan?\" ujar katua RT nang hanyar datang batakun.
\"Ulun dipaksa pambakal supaya banyanxi baduit, itu tamasuk pungli alias KKN\" sahut palui.
\"ikam salah tarima lui ai, pambakal manyuruh ikam kadanya banyanyi wan duit atawa babayar tapi banyanyi badua wan kawan nang istilahnya baduet. Jadi maksudnya baduet kadanya baduit\" ujar ketua RT menjelaskan.
\"Oooo...itukah maksudnya pambakal, ulun kada paham, ampun maaf karna ulun kira baduet wan baduit itu sama haja, sakalinya babida tulisannya\" ujar Palui paham sambil mancium tangan pambakal dan wayah basalaman itu Palui lihum manarima amplok salam tempel pambakal. (bpost/team)
