SALWAS lagi anum Palui lawan kakawanannya rancak banar bapiknikan kagunung
Biasa wayah bapiknikan itu rami bamandian di pancuran banyunya dingin lawan haning, sambil barabah batilantang di batu nang banyunya kakacapan.
\"Dasar rami banar wayah bahari itu, wayah ini asa kada kawa di ulang lagi, karna kita batiga sudah tuhaan\" ujar Palui.
Hi ih dasar rami banar, apalagi wayah barabut bubuahan nang larut di sungai\" ujar Tulamak manyahuti.
\"Tapi ikam biasa tapakalah\" ujar Garbus manunjuk Tulamak. \"Tapakalah kayapang Bus?\" ujar palui batakun.
\"ikam kada ingatkah lui, wayah itu Tulamak tamuak muak mangaluarakan isi parutnya, sampai talu hari inya kada kakaruan makan minum amun maingatakan kajadian itu\" ujar Garbus.
\"Kada aku kada ingat, pabila lah?\" ujar palui maingatakan. \"Uuu..iya hanyar aku ingat,wayah itu ikam naik ka gunung Tuhirang\"Ujar Garbus. \"nang kaya apang kisahnya?\" ujar palui.
\"Wayah itu kami rami barabut bubuahan nang larut itu, Tulamak himung banar kawa manangkap buah kasturi, lalu langsung di makannya, kulit kasturinya sudah takuyak dan masak banar makanya pina lunyak\" ujar Garbus mangisahakan.
Iya am aku liat buah itu pina kantal bulat mambari kapingin di makan, makanya langsung ku suap, ee sakalinya kacimuan bau jaring. Makanya langsung ku luak,kada mungkin kan kasturi babau kaitu\" ujar tulamak manjalujuk.
\"hahaha..ampun maaf mak ai, aku kada singhaja, akulah penyebabnya jadi ikam bahaharian muak\" ujar palui hanyar mangaku.
\"Waktu aku naik kagunung aku kada tahan lagi, parutku sakit banar, jadi aku bahira di hulu pancuran itu, kada ingat pada bubuhan ikam rami bamandian di situ\" ujar Palui manjalasakan.
\"bah..bangsat banar lah ikam ni lui ai batahun tahun hanyar bapadah, jadi ikam lah nang bahera disitu?\" ujar Tulamak manyumpah. Inya hanyar ka ingatan dalam parjalanan sawat singgah di warung dan rami banar mamakan jaring.
\"haha..hahaha...ampun maaf mak ai aku bubujuran kada singaja waktu itu\" ujar Palui lihum sambil manyalami Tulamak lawan garbus.