Hari ini Palui sibuk banar bagawi, bulik karumah parak kakadapan, imbah sampai dirumah langsung minta ambilakan tapih lawan nang bini, \"Umanya ambilakan tapih pang\" ujar Palui.
\"Ayuha abahnya ai, hadangi dahulu\" ujar bini Palui.
\" Oi abahnya! Tadi ada urang subalah basaruan, kaina imbah isa datangi jar handak bahaulan\" ujar bini Palui mamadahi. Nang sakalinya Palui babungkun kalapahan di dalam kamar.
\"Bujurkah umanya, kaina mun imbah isa bangunakan akulah, aku handak saruan jua\" ujar Palui
\"Abahnya bangun bangun jadikah umpat saruan tadi\" ujar bini Palui mambangunakan pas waktu handak tulakan sudah. Kadangaran diluar urang urang galu dijalan manuju rumah tampat baaruhan.
\"E eh umanya ai aku bangun jua, kupiah buruk ku mana yu umanya?\" ujar Palui manyahuti sambil batakun kupiah buruk, kupiah nangitu mulai sabaharian sudah dipakai Palui imbah handak saruan bahaulan atawa bamumulutan. Palui sabubutingannya itu haja baisian kupiah karna ujar palui kupiah nangitu banyak apuahnya.
\"Nah kada tahu ulun abahnya ai, bakas nang samalam dimana pian maandak?\" ujar Bini palui manyahuti wan balik manakuni.
\"Aku kada ingat jua umanya ai nah, makanya aku tadi batakun wan ikam\" ujar Palui sudah mulai sarik, samantara diluar urang sudah sunyi laluan, dan disabalah rumah sayup-sayup tadangar urang batahlilan.
\"ingatakan abahnya ai dimana pian maandak kupiah nitu samalam\"ujar bini palui manyahuti pulang sambil bajalan maninggalakan Palui nang sibuk kikih-kikih mancari kupiah buruknya.
Kada biasa Palui sasibuk itu bacacari, sampai inya muyak kada jua saling dapatan. \"Dasar sial banar malam ini aku\" ujar sipalui bapandir manggarunum. Sampai urang-urang tadi nang saruan sudah mulai bulikan kada jua dapat.
Palui pinanya panasaran lawan urang nang datang saruan laluan dimuka rumahnya, kemudian inya maintipakan malalui luang tawing, dan kabatulan nang lalu disitu si Garbus wan Tulamak. \"Maa...ai Bus aku puas banar hari ni saruan kam\" ujar Tulamak.
\"Aku puas jua am Tulamak ai saruan tadi, napang iwaknya ganal-ganal bilang kaya tabah hirisan dagingnya\" ujar Garbus manyahuti. Samantara Palui maintipakan batambah kada kakaruan rasa inya mana parut lapar ditambah mandangar kakawanan saruanan ganal-ganal iwaknya.\" Rugi banar aku malam ini kada taumpat\" ujar Palui bagarunum pulang.
Sambil manyasali kajadian itu, Palui pina asa panat kamudian inya barabah diatas gulungan tikar purun, tapi kada lawas bangun pulang karna ada asa mangganjal badugul didalam gulungan tikar nang dirabahinya tadi.
Imbah dibuka gulungan tikar tadi, Palui takajut wan bacampur sarik nang sakalinya itu ti nang di cari-cari hanyar tatamu, kupiah buruknya tatabun di gulungan tikar, nang ngaran kasarikan Palui balakas kadapur maambil parang kamudian di cancangnya kupiah buruk tadi, bini Palui kada sampat lagi manangati wan sapalihan takutan jua kalo pina tarimbat-rimbat.
Palui taduduk marasa puas imbah mancancang kupiahnya.\" Nah tamat sudah riwayat kupiah buruk ku\" ujar palui asa laga.
