Ada pangalaman Palui wayah inya disuruh bininya kapangkalan minyak gas karna sudah dua hari kada baisi minyak gasan manyanga iwak. Palui di julungi duit paspasan oleh bininya, cukup gasan manukar salitar minyak. Tulakai Palui kawadah orang bajual minyak gas. Disana baantri orang nang manukar, kada karna harganya tamurah tapi karna dasar nang bajual kadada lagi salain disana. Tapaksa Palui umpat baantri jua, imbah saparampat jam hanyar giliran Palui.
\"Aku manukar salitar haja,\" ujar Palui sambil manjulung wadah wan duit Rp3.200. \"Ampun maap kawan lah, salitarnya kada mayu lagi Rp3.200. Paling kawa dapat satangah litar labih sadikit haja,\" ujar nang bajual. \"Hau, maka biasanya aku manukar Rp3.20 haja salitarnya. Kanapa maka ikam sambat kada mayu?\" ujar Palui.
\"Wayah ini ngalih banar dapat minyaknya. Dahulu bujur haja dua hari sakali urang maantari, tapi wayah ini saminggu sakali haja lagi\" ujar nang bajual. Lawas Palui bapikir lalu inya manyambat, \"Kalu kaya itu sacukup duitnya haja\" ujar Palui.
Imbah sudah ditakarakan urang Palui parmisi handak bulik. Wayah handak babuat kasapida Palui babulik pulang ka wadah urang bajual minyak tadi. \"Uii wal, bulih lah aku umpat mancalap handuk gasan mambasahi salibur sapida karna rigat kana lucak,\" ujarnya sambil mangaluarakan handuk. \"Kalu sahibar gasan mambarasihi sapida bulih haja\" jar nang bajual.
Wayah urangnya kada malihat maka diculupnya handuknya salambaran, imbah basah jumus lawan minyak maka bukah Palui ka pinggir, lalu diparahnya kadalam wadah minyak tadi. Bulik karumah, bini Palui kasukaan banar karna manjulung duit gasan manukar minyak salitar kawa mambawa bulik minyak mandua litar labih. \"Insya Allah aku kada badusa karna aku sudah bapadah maminta sahibar umpat mancalap,\" ujar palui tatawa dalam hati. (ivd/mht) ___________________________________