Imbah bulik di kantur Palui bilang kada kawa kamana mana, ngalih inya bajalanan aur di galahi bininya haja. Mun bulik datang ba usaha kamalaman marangut tu pang.
Waktu hari itu ada acil Irus basaruan ma aruhi lakinya, pas Palui balum datang bagawi ,maka kada di padahakannya lawan Palui.
Namun rupanya Palui sampat batamuan Garbus di masigit waktu imbah sambahyang asar.
\"Lui ikam adalah di saru acil Irus malam ini ba aruhan di rumahnya\" ujar Garbus manakuni. \"Lawan aku kadada pang basaruan Bus ai\" ujar Palui manyahuti. \" Maka tadi ti acil Irus ampah karumah ikam Lui ai\" ujar Garbus manyahuti.
\"Bujurkh Bus? Nah kalo kaitu pasti aku di sarunya jua, tapi biniku haja kada mamadahakan, mun kaitu malam ini kayapa caranya aku umpat saruan jua\" ujar Palui.
\"Mun kaitu kita baimbai haja tulakan Lui ai, kaina aku mambawai Tulamak jua mahadangi di muka rumah lah!\" ujar Garbus manyahuti.
\"Sip banar Bus ai..ayuja malam ini kita tulakan baimbai hadangi ha\"..ujar Palui.
Imbah malam Palui sibuk kayapa caranya inya kaluar rumah, tuhuk sudah mamikirakan kayapa caranya hanyar ada tapikir, inya bapadah lawan bininya handak ka rumah pambakal ada kaparluan penting..hanyar kawa tulak.
Imbah mahadang batatangah jam di muka rumah garbus hanyar takumpulan, maka tulakan lah Palui lawan kakawanannya saruan kala acil Irus.
\"Bah paham banar bubuhan ikam ni Lui ai, imbah tuntung batahlilan lwan baca doa hanyar datangan\" ujar katua RT manyindir.
\"karna talambat maka bubuhan ikam tugas basisimpun lawan babasuh piring Lui ai\" ujar Katua RT pulang manyambung.
\"Jangan kan babasuh piring mun di rumah acil irus ni, bamalam kami lawan Katua ai\" ujar Palui manyahuti.
Karna talambat datang maka Palui lawan kakawanannya kabagian duduk dimuhara lawang. \"aku katuju banar Bus ai di muka lawang ni nyaman mambilukakan iwak\" ujar Palaui lihum.
\" Silahkan silahkan di makani\" ujar mamarina acil irus manyuruhakan.
\"Uma Lui, satumat banar maka habis babarapa piring iwak\" ujar Garbus. \"Aku tapakai ilmu Tulamak bus ai\" ujar palui manyahuti.
\" Iya tu, aku hakun haja di burukakan asal iwak nang dimakan jadi awak lamak kaya aku, kada kaya Palui inya ada bagaduhan naga di dalam parutnya Bus ai jadi banyak makan iwak pada nasi\" ujar Tulamak mambalas.
Imbah tuntung makanan bubuhannya mulai kaluaran, Palui jua bagamat ma umpati , tapi rupanya diluar pina kadap waktu Palui turun pada rumah inya tajarungkup kibut kibut lawan tapih. Di tampih palui pina banyak kalihatan kaluaran darah.
\"Palui...Palui kaguguran...Palui kaguguran darahnya banyak kaluaran\" ujar Garbus lawan Tulamak sambil mambantu Palui bangun.
\" basunyi...badiam ha Bus ai, aku kada batianan bini ku nang batianan jadi kada mungkin aku kaguguran\" ujar Palui manyahuti.
\"Darahnya habang banar lawan pina babau ganyir, jua pina ada lumbuknya, astaga ikam mambarakat iwak dalam tapihkah Lui?\" ujar Tulamak.
Maka katahuan pulang panyakit lawas Palui, yaitu kabiasan nang kada baik di tiru, suka handak banyak banyak mamakan iwak manabun didalam tapihnya.