\"Ujar habar di kampung kita ini ada guru nang hanyar datang, sidin bagalar habib jua harat, kayapa kita umpat balajarkah lawan sidin?\" ujar Palui manakuni kakawanannya.
\"Akur akur banar Lui ai. Pabila kita malam ini kah\" ujar Garbus manyahuti.
\"Aku handak umpat jua nah balajar\" ujar Tulamak manyahuti.
Maka imbah malam Palui lawan kakawanannya tulakan ka rumah habib tersebut.
\"Assalamualaikum, ujar Palui lawan kakawanannya. \"Waalaikumsalam\" ujar sidin manyahuti lawan manyuruhakan masuk karumah. \"ayu silahakan duduk, ada alar apa nih bubuhan ikam datang kasini\" ujar Guru manakuni.
\"Kami nih handak balajaran wan pian , pian ni tuan guru kalo\" ujar Palui manakuni.
\" Nah kada tasalah lah buhan ikam handak baguru lawan aku\" ujar guru manakuni pulang. \"Kada guru ai kami sudah mantap banar handak balajar lawan pian\" ujar Palui manyahuti.
\" Amun kaitu ayu ai bubuhan ikam balajar di sini, malam ini bubuhan ikam ku lajari ilmu bibinian\" ujar guru
\"Bibinian itu bila di sasahi inya bukah, tapi bila di diamakan inya baparak\" ujar sidin pulang.
\" Hau...ampun maaf guru ai, kami kasini handak balajar ilmu agama, napa pian jadi mangisahakan bibinan\" ujar Palui heran.
\"uuu..kaitukh, amun bubuhan ikam handak balajar ilmu agama, aku gin masih kurang jua\" jar sidin.
\"hau..pian nih habibkah kada kah? Ujar Palui manakuni.
\"Ua..hahaha...mauk jua ni\" ujar sidin sambil mangahak tatawa. \"Aku ini sabanarnya guru di sakulahan, kabalujuran haja aku ini haji, lagi anum bahari aku katuju banar ma anui bibinian, jadi aku di barii galar habib\".
\"Uaa jadi pian nih lain tuan guru habib itulah?\" ujar Palui lawan kakawanannya kacewa.
\"Bararti kami ni tasalah guru lah? Kami kira ti pian ulama\" ujar palui kakalahan sambil minta pamit mambawai kakawanannya bulikan.(b.post.)